همسات من مازغان

منين نبدا الحكاية

كيفاش ننقش لبداية

ها الثقافة صبحت بلا ريحة

ها الأدب ضاع لو سرو و المْليحة

علاش كثرو البواق

علاش خضار النفاق

هذا يقلب وجهو

و ذاك يخبي شمعتو

و أنا بين البارح و اليوم

شفت اللي جرى في النوم

قلت اللي دازت على الراس

زينة واخة تطير النعاس

و النعاس هجرني م طار

و الشمتة في قلبي شاعلة نار

علاش النفاق ، علاش المنكر

ها أنا بين قبة و قبة

ها أنا يا البيضا

يا اللي م خلاوك بيضا

ها أنا نطوف تحت الشتا

زناقيك تغزل الوفا

و طرقانك تتوحم على الهنا

ها أنا نحاجي على الفقرا

هي حومة ما فيها نصارة

و الشتا تغسل وسخ الخسارة

من درب لدرب من زنقة لزنقة

الهنا ما بقى هنا

و الشارع الطويل يهضر في شونو

حشمان من سرو ما عرف كيف يكَولو

غير هضر و خوي الخنيشة

راني تكرهت في هاذ العيشة

غير هضر بلا م تحشم، بلا م تكل

غير هضر و لْْفنا الحكَرة و الذل

الزناقي بلا مكتبات

و السينمات رجعو محلبات

آه الأيام و شحال من آه تكَدني

آه الأيام ، هاذ الحمل هدني

ها أمنية مشي أمنية

ها أمنية فيها سيناريو المقبرة

و حياتهم مشات خسارة

ذاكرتي تكبلات ، تغيرات

لله يا البيضا م بغيت جوا منجل

بغيت غير الهنا و راحة البال

لله يا البيضا روحك تتسل

و ليت أنا و أنت من المحال

و الشتا.أنت يا الشتا أشنو نعمل

غسلي القلوب من السم

وصُوني و ليداتك من الهم

الشتا يا الشتا

وجه البيضا كلو نْديبْ

ديما حاركَة ، تحضر و تغيبْ

و أنا نكتب حكايتي

على أوراقك يا البيضا

أنا نبكي على صدرك يا البيضا

ضميني، ضميني

راني بلا بيك القهرة تجليني

رقعي معاية جلدي و جلدهم

ركبي حماقي و حماقهم

أنت يا البيضا

مالك شردتي الأولاد

مالك ودرتي الأوتاد

ها أنا نغسل عارهم في إكسيلوسيور

و نرمي تابعتهم في سيدي بليوط

آه يا البيضا عليك ضحكو

منين كَالو راك بيضا